LAOAG CITY – Inlawlawag ni Senador Panfilo Lacson a ti pannakaikonektar ti ginasgasut a flood control projects kas maipagarup a “ghost projects” ket naggapu iti biddot a grid coordinates a naisubmitir iti Malacañang idi panawen ti panangidaulo ni dati a Department of Public Works and Highways Secretary Manuel Bonoan.
Iti agtultuloy a panagdengngeg ti Senate Blue Ribbon Committee, tinalantan ti kinapateg ti naur-urnos a project mapping, husto a geographic coordinates ken naiget a panangberipikar tapno maliklikan ti saan nga umiso nga interpretasion iti estado dagiti proyekto.
Naammoan a gapu kadagiti saan nga husto a datos, naaddaan ti atap nga adda dagiti proyekto a napukaw uray sumagmamano kadagitoy ket aktual a naisayangkat ken masarakan iti aktual a lokasion iti field.
Basar kadagiti inwayat a joint inspection ti Department of Public Works and Highways, karaman kadagiti site visit idiay Bulacan, napaneknekan a maipatpatungpal ken naiyimplimentar dagiti sumagmamano a proyekto nga immuna a pagat-atapan.
Nupay kasta, adda dagiti proyekto a nasarakan iti dadduma a lugar gapu iti saan a tugma a coordinates a naisubmitir kadagiti opisial a datos.
Mainaig iti daytoy, dagiti resulta dagiti nasao nga inspeksion ket nakaipalaon iti pormal a report ti Department of Public Works and Highways.
Nailawlawag pay a dagiti kontratista ket naiget a sumursurot kadagiti teknikal a plano, disenio ken direktiba nga ipapaay ti Department of Public Works and Highways.
Awan ti bileg dagitoy a mangbaliw ti lokasion ti proyekto wenno mangikeddeng ti bukud a coordinates.
