LAOAG CITY – Inlawlawag ni Mr. Danilo Arade, Senior Agriculturist iti Provincial Agriculture Office dagiti sumagmamano a pagilasinan no ti mailaklako nga abono ket peke wenno saan.
Inbatad na a kitaen nga umuna no ti abono ket nakarehistro iti Food and Drug Administration wenno FDA.
Malaksid iti daytoy, no nalaka unay ti presyo ti abono ket masapol a saan nga agtalek a dagus.
Kuna na a ti maysa pay a pagilasinan ket no awan unay ti angot ti abono kas ti nakumpiskar a peke a produkto manipod iti Technical sales representative ti Northern Prime Trading Corporation a ni Vilbert Asuncion, agtawen ti 31, residente iti Brgy. Sta. Cruz iti ili ti Badoc ken ni Rheygie D.Colobong, agtawen ti 25, residente iti Barangay Pacifico iti ili ti Marcos.
Ti Northern Prime Trading Corporation ket awan ti otorisasyon nan nga ag-produce ken aglako kadagiti produkto na nga abono gapu ta idi pay Marso ita a tawen nga adda ti ballaag ti Department of Agriculture nangruna iti biang ti Fertilizer and Pesticide Authority a dagiti ilaklako ti nasao a kompanya ket illegal.
Immuna iti daytoy, natiliw dagiti maseknan kalpasan a napan da nagdeliber ti peke a ganagan iti paset ti Brgy. Buyon iti ili ti Bacarra.
Mainaig iti daytoy, inpakaammo ni Arade a malaksid kadagiti napan indeliber da Asuncion ken Colobong iti ili ti Bacarra ket adda payen dagiti immuna nga indeliber da iti ili ti Marcos, Dingras ken Sarrat.
Innayon na nga iti agdama ket adda pay ti 27 a sako ti abono a nakapenpen iti maysa a bodega iti ili ti Badoc nga isu ti mapanda alaen tapno masigurado a saanen a maiwaras pay dagitoy.
Kabayatanna, inpaganetget ni Arade a masapol a liklikan ti agusar ti peke nga abono tapno maprotehiran iti aglawlaw gapu ta no maiyaplikar iti daga ket adda ti negatibo nga epekto na pakairamanan ti mula.
