LAOAG CITY – Nagballigi dagiti kameng ti Philippine National Police (PNP) a nangtiliw iti maysa a senior citizen a babai iti inyuswat da a drug buy-bust operation iti Barangay Anao iti ili ti Piddig.
Ti subject ti operasyon ket agtawen ti 68, balo ken residente iti nadakamat a barangay.
Segun ken ni Police Lt. Tolentino Erum, ti chief of police iti ili ti Piddig, immunan a nangiyuswat da ti operasyon iti balay ti suspek itay napan a bolan gapu iti panagpaspasugal na ngem nairana idi nga awan ti suspek.
Nupay kasta, iti panangiyuswat da ti drug buy-bust operation ket ditoy a natiliw da ni suspek kalpasan ti maipagarop a panaglako na iti maysa a sachet a naglaon ti maipagarop a marijuana.
Malaksid iti inlako ti suspek a maysa a sachet ket nakaala pay dagiti otoridad ti dua a sachet a naglaon met laeng ti marijuana iti ikot na, ken ti 500 a pisos a nausar iti operasyon.
Kuna na a basar iti panagmonitor da ket iti laeng balay ni Valentin ti paglaklakoan na iti marijuana no sadinno a mapan a mismo danunen dagiti aggatang.
Kabayatanna, inpasingked ni Valentin a saanna a kukua dagiti marijuana a naala iti ikot na ngem ti sungbat ni Erum ket kastoy a kanayun ti ibagbaga dagiti matiltiliw da iti drug buy-bust operation.
