LAOAG CITY – Dead on arrival iti ospital ti maysa a senior citizen a lalaki kalpasan a nadungpar ti maysa a closed van iti paset ti national highway, bisinidad iti Barangay Bungon iti ciudad ti Batac.
Daytoy ti inrakurak ni Police Lt. Col. Adrian Gayuchan, ti Officer-In-Charge iti Philippine National Police iti ciudad ti Batac.
Segun ken ni Gayuchan, ti biktima ket agtawen ti 60, karpintero, agdama nga agtrabtrabaho da iti Barangay Bungon ngem residente iti ili ti San Nicolas, idinto a ti driver ti Van ket agtawen ti 33, ken residente met iti ili ti San Nicolas.
Inpakaammo ni Gayuchan nga iti imbestigasyon da, kabayatan ti panagpapa-amyanan ti closed van ket bigla a bimmalasiw ti biktima a nangitunda ti pannakadungpar ti Van ken naipasiruk pay daytoy iti nasao a behikulo.
Kuna ti opisyal a ti palawag kadakuada ti driver ti van ket saanna a dagus a nakita ti biktima gapu ta nakapsot ti silaw iti kalsada.
Naitaray a dagus iti ospital ti biktima ngem naideklarar a dead on arrival gapu kadagiti sinagaba na a nakana a sugat iti nagduduma a paset ti bagina.
Inpakaammo ni Gayuchan nga addan ti inisyal a panagsarita ti driver ti van ken ti anak ti biktima no sadinno a kiniddaw ti pamilya a tumulong ti maseknan iti magastos da iti ospital.
Inpasingked met ni Gayuchan a saan a nakainom ti nasanger ti driver ti closed van
Iti agdama, nagtalinaed ti driver ti van iti kwerpo ti pulisya iti ciudad ti Batac.
