LAOAG CITY – Addan iti natalged a kasasaad ti maysa a senior citizen a nadungpar ti maysa a kurong-kurong partikular iti Rodolfo R. Bypass Road iti Brgy. 58 Casili ditoy siudad ti Laoag, idi Disiembre 19, 2024.
Segun ken ni Police Staff Sergeant Alexson Rosal, Duty Investigator ti Philippine National Police – Traffic Division ditoy siudad ti Laoag ti biktima ket ni Charito Fe Benito Atud, agtawen ti 66, ken residente iti Brgy. 60-A Caaoacan idinto a ti nagmaneho ti kurong-kurong ket ni Joseph Iliong Calican, agtawen ti 27, residente ti Brgy. 14 Binsang iti ili ti Pasuquin.
Basar iti imbestigasion, agturturong iti daya adireksion ti motorsiklo idi kellaat a nadungparna ti biktima a nga agbalballasiw iti kalsada.
Gapu iti daytoy, nabaliktad ti motorsiklo bayat a naitapuak ti biktima ket nagsagaba daytoy iti leg fracture ken sugat iti nagduduma a paset ti bagina idinto a nagsagaba ti driver ti kurong-kurong ti minor injuries.
Dagus a nagresponde ti DPS Paramedics ken naitaray iti Governor Roque Ablan Sr. Memorial Hospital para iti pannakataming na ken naiyakar iti Mariano Marcos Memorial Hospital and Medical Center.
Kinuna ni Rosal a naikkan ti citation ticket a driving under the influence of liquor ti driver ti kurong-kurong.
Kabayatanna, kuna ni Roasl a saan pay a nagasarita ti biktima ken ti kurong-kurong driver.
