LAOAG CITY – Natay ti senior citizen kalpasan a naatalan ti maysa a pick up iti Barangay 2 Sta. Joaquina ditoy siudad ti Laoag.
Ti biktima ket agtawen ti 77 ken residente met laeng iti nasao a barangay idinto a ti nangiturong iti pick up a Toyota Hilux ket agtawen ti 29 ken residente ti Barangay 21 San Pedro ditoy siudad ti Laoag.
Basar iti Laoag City Police Station, kabayatan a dumaldalyasat ti pick up iti paset ti P. Gomez Street nga agturong nga agpa-laud ket idi nakadanon daytoy iti Gov. A. Agbayani Street ken aglikko nga agpakannawan nga agturong nga agpa-amianan ket napalidlidan ti akinkannawan a ligay ti pick up ti biktima a nakaidda iti kalsada.
Gapu iti daytoy, nagsagaba ti sugat iti nagduduma a paset ti bagi ti biktima nga insigida a naitaray iti Governor Roque Ablan Sr. Memorial Hospital para iti naan-anay a pannakatamingna ngem naideklara a dead on arrival babaen ti attending physician a ni Dr. Joseph Castro idinto a saan met a naan-ano ti nangiturong ti pick up.
