LAOAG CITY – Natay ti maysa a Senior Citizen a nakalugan ti kurong-kurong kalpasan a napalidlidan ti bus iti Barangay 18, San Isidro iti ili ti Pasuquin.
Ti nangiturong ti kurong-kurong ket agtawen ti 43, naasawaan, mannalon idinto a ti pasaherona ket agtawen ti 62, naasawaan, vendor ken agpada dagitoy a residente ti Barangay 13, Naglicuan iti ili ti Pasuquin.
Ti nangiturong met ti bus ket agtawen ti 57 ken residente ti Tokitoc Sanchez Mira, Cagayan Province.
Basar iti inisyal nga imbestigasion ti Pasuquin Municipal Police Station, kabayatan a dumaldalyasat ti dua a lugan nga agpada nga agturong nga agpa-amianan ket nasapgud ti bus iti likud a paset ti kurong-kurong.
Gapu iti daytoy, naipurwak ti kurong-kurong pakairamanan ti driver ken pasaherona iti sumurok-kumurang 36 a metro a kaadayona no sadinno a ti pasahero ket napalidlidan ti bus a nangitunda ti pannakaideklararna a dead on the spot babaen ken ni attending physician Dr. Diophantos Acob idinto a ti driver ket nagsagaba ti sugat iti nagduduma a paset ti bagina nga insigida a naitaray iti Rural Health Unit iti ili ti Pasuquin para iti naan-anay a pannakatamingna.
Mainaig iti daytoy, saan met a naan-ano ti driver ti bus ken dagiti 32 a pasaherona.
Kabayatanna, agtultuloy pay laeng ti iwaywayat nga imbestigasion dagiti otoridad mainaig iti insidente.
