LAOAG CITY – Kinumpirmaran ni Dr. Rickson Balalio, mangidadaulo ti Provincial Health Office nga adda ti maysa a senior citizen manipud iti ili Dingras ti pimmusay gapu iti dengue.
Segun kenkuana, basar iti datos manipud iti Setiembre 8 agingga 14 ita a tawen, adda ti pakabuklan nga 431 no sadinno 28 ditoy ket maibilang a baro a kaso ti dengue.
Iti umuna a distrito, nairekord ti kaadduan a kaso ti dengue ditoy siudad ti Laoag nga addaan ti 62, sinaruno iti ili ti Pagudpud a 50, 24 iti ili ti Bangui ken Piddig, 16 iti ili ti Sarrat, 15 iti ili ti Vintar, 12 iti ili ti Bacarra, 11 iti ili ti Pasuquin, 9 iti ili ti Burgos, 3 iti ili ti Carasi, 1 iti ili ti Dumalneg idinto nga awan ti kaso ti dengue iti ili ti Adams.
Mainaig iti daytoy, iti maikadua a distrito, nairekord ti kaadduan a kaso ti dengue iti siudad ti Batac nga addaan ti 100, sinaruno iti ili ti Badoc a 23, 20 iti ili ti Paoay, 13 iti ili ti San Nicolas, 12 iti ili ti Solsona, 8 iti ili ti Marcos ken Pinili, 7 iti ili ti Banna ken Dingras, 5 iti ili ti Currimao idinto nga adda ti maysa a kaso ti dengue iti ili ti Nueva Era.
Maipalagip nga iti napalabas a tawen 2023 ket awan ti pimmusay gapu iti dengue ditoy probinsia.
Kabayatanna, nagpalagip ni Dr. Balalio ti kanayon a panagdaldalos tapno maliklikan a makaptan ti makapatay a sakit a dengue.
