LAOAG CITY – Inpakaammo ni Gob. Matthew Marcos Manotoc nga adda ti maysa a lalaki a senior citizen ti mapukpukaw iti ili ti Bangui a posible a naiyanud idi kangitingitan ti iduduprak ti Bagyo Neneng.
Daytoy ti rakurak ti Gobernador kabayatan ti pannakaisayangkat ti press conference ken panangibinsabinsa na kadagiti reports pakaseknan iti napasaran ti probinsia gapu iti nasao a bagyo.
Immuna iti daytoy, kuna ni Police Staff Sergeant Eddie Tajon, ti Imbestigador ti Philippine National Police iti ili ti Bangui, ti madakdakaman a biktima ket nabigbig a ni Rudy Lester Manegdeg y Agullana, agtawen ti 72, naasawaan, agar-aramid ti hollowbocks ken residente ti Brgy. San Lorenzo iti nasao nga ili.
Inbatadna a basar iti insayangkatda nga imbestigasion ket agarup ala una ti malem idi domingo ket napakaammoan iti istasyonda a ti biktima ket mapukpukaw iti maysa nga abung-abong iti paset ti Bago River a masarakan iti Sitio Ubbog, Brgy. San Lorenzo iti ili ti Bangui.
Kunana a masansan nga iti abung-abong ti pagturturugan ti biktima tunggal madanon ti rabii maibasar iti nakalapda nga impormasion kadagiti makaam-ammo ken pamilia ti biktima.
Inlawlawagna nga agarup alas dies ti rabii idi Oktubre 15 ket mapapati a posible a naiyanud daytoy kalpasan a ngimmato ti lebel ti danum ti karayan gapu iti napigsa a buyat ti tudo ken angin gubuay iti isasaplit ti Bagyo Neneng.
Innayonna nga iti agdama ket manarimaan pay laeng ti maisaysayangkat a search and retrieval operation babaen ti Philippine Coast Guard ken dadduma pay a maseknan nga otoridad tapno mabirukan ti biktima.
Kabayatanna, naammoan a naipakaammo metten daytoy a pasamak kadagiti dadduma pay a Police Station tapno al-alisto ti koordinasion dagitoy.
