LAOAG CITY – Balligi a naarestar ti maysa a Senior Citizen babaen iti Anti-Illegal Drug Buy-bust Operation iti ili ti San Nicolas.
Nabigbig ti suspek a ni Arthur Daoang y Fiesta, agtawen ti 62, naasawaan ken residente ti Brgy. 9 iti nasao nga ili.
Segun ken ni P/Capt. Randy Damo, Hepe ti San Nicolas Municipal Police Station, natiliw ti suspek kalpasan a maipagarup a naglako ti maysa nga heat sealed transparent plastic sachet a naglaon ti maatap a shabu iti maysa a pulis a nagpammarang kas poseur-buyer.
Inbatadna nga agdagsen ti nakumpiskar a maipagarup a shabu ti 1.2 a gramo ken agbalor daytoy ti 8,160 a pisos.
Kunana a ti nadakamat a suspek ket maibilang nga Street Level Individual ken naigetna a naglikudan a kukuana dagiti naala a kontrabando.
Innayonna nga iti agdama ket nagtalinaed ti suspek iti pagbalodan iti San Nicolas Municpal Police Station ken sumango iti kaso gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002.
Kabayatanna, naammoan a ti suspek ket maysa a barangay tanod ken drug surrenderee daytoy.
