LAOAG CITY – Naarestar ti maysa a senior citizen iti Anti-Illegal Drug Buy-bust Operation iti Barangay 1 ditoy siudad ti Laoag.
Nabigbig ti suspek nga agtawen ti 66, naasawaan ken residente iti nasao met laeng a barangay.
Basar iti Laoag City Police Station, natiliw ti suspek kalpasan a naglako ti atiddog nga heat sealed transparent plastic sachet a naglaon ti maysa a gramo a maipagarup a shabu iti maysa a nagpammarang kas police poseur buyer.
Gapu iti daytoy, naala dagiti otoridad manipud iti suspek ti lima nga atiddog nga heat sealed transparent plastic sachet a naglaon ti maatap a shabu, dua a transparent heat-sealed plastic sachet a naglaon ti mapapati a shabu, tallo nga open transparent plastic sachet, maysa a ribu a pisos a nausar kas buy-bust money ken dadduma pay a drug paraphernalia.
Malaksid iti daytoy, nakumpiskar pay dagiti otoridad manipud iti suspek ti maysa a rusted homemade revolver caliber 22 nga addaan ti tallo a pedaso a balana.
Naammoan nga agdagsen dagiti nakumpiskar a maipagarup a droga ti 6.8 a gramo pakairamanan dagiti plastic materials.
Kabayatanna, sumango ti suspek iti kaso gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002 ken ti Republic Act No. 10591 wenno ti Comprehensive Firearms and Ammunition Regulation Act.
