LAOAG CITY – Natay ti maysa a senior citizen kalpasan a nadungpar ti SUV ken kurong-kurong iti Brgy. Davila iti ili ti Pasuquin.
Segun ke ni P/Maj. Jonevale Maramag, Hepe ti Pasuquin Municipal Police Station, nabigbig ti biktima a ni Jesusa Ramil y Bulosan, agtawen ti 61, awanan asawa ken residente ti nasao a barangay.
Nabigbig met ti driver ti SUV nga Isuzu Dmax nga agmaris ti puraw a ni John Bumagay y Ibalio, agtawen ti 69, naasawaan, residente ti Brgy. Pagali iti ili ti Burgos idinto a ti nangiturong ti kurong-kurong ket ni Marie Jane Aguinaldo y Dialino, agtawen ti 46, naasawaan, vendor ken residente ti Brgy. Davila iti ili ti Pasuquin.
Inbatadna a basar iti inwayatda nga imbestigasion ken ti ala ti Close Circuit Televsion camera, agarup alas siete ti bigat, kabayatan a dumaldalyasat ti SUV nga agturong nga agpa-abagatan ket nadungparna ti biktima a bumallasiw iti bangir a kalsada nga aggapu iti laud a mapan iti daya.
Inlawlawagna a dagus a nagsardeng ti SUV iti igid ti kalsada idinto a nabati a nakadasay iti tengnga ti kalsada ti biktima.
Gapu iti daytoy, inpalgakna a napalidlidan pay ti saka ti biktima iti sumungsungad a kurong-kurong.
Kunana nga indeklara ni Dr. Diophantos Acob, Municipal Health Officer iti ili ti Pasuquin a dead on the spot ti biktima gapu iti nakana a sugat a sinagabana kas ti sugat iti ulo ken pannakatukkol ti tulangna iti sakana.
Naammoan a posible a saan a nangngeg ti biktima ti panagbusina ti SUV gapu ta nakapsoten ti panagdengngegna.
Innayonna a napagnunumoan ti agsumbangir a partido a saanen a mangipila ti reklamo ti pamilia ti biktima laketdi tumulong dagiti nakadungpar iti gastosenda agingga iti pannakaitabonna.
