LAOAG CITY – Nakita a maysan a nalamiis a bangkay ti Senior Citizen iti Barangay 6, Tonoton iti ili ti Piddig.
Ti biktima ket maysa a lalaki, agtawen ti 67, naasawaan, paver/operator ken residente ti Barangay Dau, Mabalacat City, Pampanga.
Segun ken ni P/Maj. Kristian Lee Badua, Hepe ti Piddig Municipal Police Station, apaman a nakariing ti katrabahoanna ket nakitana ti biktima nga awanen ti biagna a nakadasay iti paset ti aspalto nga adda ti maysa a tabo nga adda ti nagianna a danum iti abayna no sadinno a pinadasda pay nga isalbar ti biag ti biktima ngem timmangken daytoyen.
Inbatadna a basar ti maysa kadagiti roommate ti biktima ket agarup 12:00 ti rabii, rimmuar daytoy tapno mapan umisbo ken nariparna nga awanen ti biktima iti abayna kadayta nga oras.
Inlawlawagna nga indeklarar ni Dr. Maricon Martin, ti Rural Health Unit iti ili ti Piddig a ti rason ti pannakatay ti biktima ket naatake iti puso wenno acute coronary syndrome ken awan ti foul play a napasamak.
Innayonna a naduktalanda iti pamilia ti biktima nga addaan daytoy ti high blood pressure ken manarimaan ti maintenance medication-na.
