LAOAG CITY – Nadungpar ti maysa nga Honda CRV ti nakaparking a tricycle iti sango ti maysa a tianggi iti paset ti Barangay Capasan iti Dingras, Ilocos Norte.
Nabigbig ti nangiturong ti Honda CRV a ni Mark Johnson Hipolito y Rarogal, agtawen ti 22, taga Barangay Barcelona iti ili ti Solsona idinto a ti driver ti tricycle driver ket ni Ruffu Balis y Domingo Sr., agtawen ti 71, residente iti Barangay Bacsil iti ili ti Dingras.
Segun ken ni Police Corporal Joan Deuz, imbestigador iti PNP-Dingras, kabayatan ti panagpa-abagatan a dumaya ti Honda CRV ket kellaat a nablowout ti akin-kannawan a sango ti ligay ti nasao a lugan.
Gapu iti daytoy, naitapwak ken nadungpar ti Honda CRV ti tricycle nga agur-uray laeng ti pasahero na iti igid ti kalsada a nakairamanan pay ti dadduma a paset ti tianggi ken nakasugatan ti akin-kannigid a saka ti tricycle driver.
Dagus a napaagasan iti Dingras District Hospital ni Balis ken addaan ti 32 a dait ti saka na idinto a ti nangiturong ti Honda CRV ken saan a naan-ano.
Kabayatanna, inlawlawag ni Hipolito a naggapo da iti dakkel a mall iti ili ti San Nicolas gapu ta napan da inpaspasyar dagiti kaannakan na nga ubbing.
Nupay kasta, iti panagawid da ket kellaat lattan a nablowout ti akinkannawan a sango ti ligay ti lugan da.
Innayon na a ginandat na a liklikan ti tricycle ngem saannan a nakontrol ti inturong na a lugan.
Manamnama pay laeng ti panagsarita dagiti dua a driver mainaig iti nasao a pasamak.
