LAOAG CITY – Natay ti senior citizen kalpasan a nadungpar ti motorsiklo nga inturong ti maysa a pulis iti Sitio Laguerta ti Brgy. San Isidro iti ili ti Dumalneg.
Segun ken ni P/Capt. Junjun Medina, Hepe ti Dumalneg Municipal Police Station, nabigbig ti biktima a ni Julieta Aguda y Ramos, agtawen iti 69, naasawaan ken residente ti Brgy. San Isidro iti nasao nga ili idinto a nabigbig met ti nangiturong ti Honda ADV 150 nga agmaris ti dapo ken nangisit a ni P/Cpl. Michael Suniga y Garcia, agtawen iti 34, naasawaan, agdama a nakadestino iti Dumalneg Municipal Police Station ken residente ti Brgy. San Isidro iti ili ti Dumalneg.
Inbatadna a basar iti inwayatda nga imbestigasion, nagkamang mismo iti kuerpo ti pulisia ni P/Cpl. Suniga tapno agkiddaw ti tulong a maitaray ti biktima iti Bangui District Hospital gapu iti insidente.
Inlawlawagna nga agarup ala sais ti sardam, kabayatan a dumaldalyasat ti nakamotorsiklo nga agpa-laud ket adda ti biktima iti igid ti kalsada ngem apaman a nagbusina daytoy ket maipagarup a kellaat a bimmallasiw ti biktima a nangitunda ti pannakaidungparna iti motorsiklo.
Gapu iti daytoy, kunana a nagsagaba ti sugat ti biktima kangrunaanna iti paset ti ulona idinto a saan met a naan-ano ti pulis a nangiturong ti motorsiklo.
Innayonna nga agarup 7:44 ti rabii, naideklara a pimmusay ti biktima babaen iti attending physician a ni Dr. Rosana Garvida.
