LAOAG CITY – Natay ti maysa a Senior Citizen kalpasan a nalmes iti Padsan River iti Brgy. Guerrero iti ili ti Dingras.
Nabigbig ti biktima a ni Rogelio Domingo y Madamba, agtawen iti 66, addaan ti live-in partner ken residente ti Brgy. Madamba iti nasao nga ili.
Basar iti imbestigasion, napan nagbanniit ti ikan ti biktima iti Padsan River ngem kalpasan ti sumagmamano nga oras ket masdaaw ni Emma Felipe y Ruiz, live in partner ti biktima gapu ta saan metten nga agawid daytoy.
Gapu iti daytoy, napanna biniruk ti live in partner-na ken nagsalsaludsod kadagiti kaarrubana ti posible a nagturunganna.
Mainaig iti daytoy, nabirukan ni Menard Isnec y Galicia ti fish net ti biktima iti nasao a karayan no sadinno a dagusna nga inpakaammo kadagiti otoridad ken kadagiti residente daytoy a banag.
Naammoan nga iti rabiina, nabirukan ti bangkay ti biktima iti naadalem a paset ti Padsan River nga asideg iti nakabirukan ti fish net ti biktima.
Naitaray iti Dingras District Hospital ti biktima ngem naideklara a dead on arrival daytoy babaen iti Attending Physician a ni Dr. Eljen Vizcarra.
Natay ti biktima gapu iti asphyxia secondary to drowning ken awan ti pakalasinanna nga adda ti foul play a napasamak.
Basar iti pamilia ti biktima ket agsagsagaba ti hypertension ken saanna nga ammo nga aglangoy ti biktima.
Kiniddaw ti live in partner ti biktima a maikkan ti pakdaar iti pakaiwaywayatan ti panag-quarry tapno awan ti madesgrasia.
Kabayatanna, inpasigurado ni Vice Mayor Erdio Valenzuela iti ili ti Dingras a mangisayangkatda ti naun-uneg nga imbestigasion nangruna ket mababbabalaw ti panag-quarry a nakapasamakan ti insidente.
