LAOAG CITY – Nagtennag iti pannakatiliw ti maysa a senior citizen ti napasamak a komosyon gapo iti rugit ti aso iti Barangay 5 ditoy ciudad ti Laoag.
Nabigbig daytoy a ni Mr. Luis Mahor y Rosete, agtawen ti 74, naasawaan ken miembro ti Barangay Lupon ken residente iti nasao a barangay.
Basar iti impormasyon, inakup ni Mahor ti rugit dagiti aso na kalpasan a binagaan isuna ni Arnold Funtila y Menor, agtawen ti 64, naasawaan Barangay Treasurer iti Barangay 6 ditoy ciudad.
Nupay kasta, maipagarop nga inpurwak ni Mahor dagiti rugit ti aso kenni Funtila ngem naliklikan na rason a nagginnubal da, ken nangpidot ti bato ti suspek ken ibakal na kuma iti biktima ngem nasanggaan na daytoy babaen kadagiti ima na.
Gapo iti daytoy, napan innala ni Mahor ti paltog na a caliber 22 revolver ken maipagarop nga inpaturong na kenni Funtila.
Nupay kasta, naglikudan ni Mahor nga inpaturong na ti paltog na gapo ta inpakita na laeng ken awan ti bala na ken inpetteng na nga adda ti lisensya ti nasao nga armas.
Boluntaryo met nga insuko ni Mahor ti paltog apaman a nagresponde dagiti otoridad.
Iti agdama, adda iti kustudyar ti PNP-Laoag ti suspek bayat a maisagsagana ti kaso a panaglabsing iti RA 10591 ken Grave Threat.
