LAOAG CITY – Natiliw ti maysa a baket gapu iti panagibugaw na ti babbai iti Brgy. 51-B Nangalisan ditoy siudad ti Laoag.
Nabigbig ti suspek iti nagan a Carling, agtawen ti 67, balo, residente iti Brgy. 24 iti ili ti San Nicolas.
Segun kenni Police Lt. Col. Rafael Lero, hepe ti PNP Laoag, adda ti naawat da a report seknan ti aramid ti suspek.
Gapu iti daytoy, nangiwayat da ti entrapment operation no sadinno a nagpammarang a customer ti pannakabagi ti linteg, rason a natiliw da ti suspek bayat nga adda da iti uneg ti hotel.
Narekobre dagiti otoridad ti nausar a kuarta a pakaibilangan ti lima a pidaso ti genuine 500 peso bill ken lima a pidaso ti 1,000 peso bill a boddle money.
Naisalakan met dagiti otoridad dagiti lima a babbai nga agtawen ti 20, tubo iti Bacoor Cavite; agtawen ti 36, awanan asawa, tubo iti Muños, Nueva Ecija, agpada nga agnanaed iti Brgy. 6 San Nicolas; agtawen ti 34, waitress iti Carling videoke, tubo iti Camarines Sur; agtawen ti 35, awanan asawa, tubo iti Abuyog Leyte; ken ti agtawen ti 35, tubo iti General Santos City, Cotabato ken agpapada da nga agnanaed iti Brgy. 1 ditoy siudad.
Innayon ni Lero a maisagsaganan ti maipila a reklamo kontra iti suspek seknan iti anti-trafficking.
