LAOAG CITY – Mabalinen a makaawat ti sangapulo a ribu a pisos dagiti senior citizen nga agtawen ti 80, 85, 90 ken 95.
Daytoy ti inpakaammo ni Ms. Erlinda Agustin, mangidadaulo ti Office of the Senior Citizens Affair ditoy siudad ti Laoag.
Segun kenkuana, daytoy ket maibasar iti baro a linteg nga Expanded Centenarian Act wenno ti Republic Act No. 11982 a mabalin nga i-avail dagiti senior citizen.
Inbatadna a no idi ket dagiti laeng agtawen ti 100 ti makaaw-awat ti 10 a ribu a pisos iti tunggal tawen, itatta ket karaman payen dagiti agtawen ti 80, 85, 90 ken 95.
Nupay kasta, inlawlawagna a manarimaan pay laeng a maiplasplastar dagiti kasapulan a requirements a nasken a maisubmitir dagiti agaplikar a senior citizen.
Innayonna nga agtultuloy ti panangipaayda ti tulong kadagiti senior citizen babaen kadagiti isaysayangkatda a programa.
