LAOAG CITY – Pimmusay ti maysa a senior citizen kalpasan a nabagko-bagkong iti Barangay 32-A Lapaz ditoy siudad ti Laoag.
Ti biktima ket agtawen ti 70, naasawaan idinto a ti suspek ket agtawen ti 59, naasawaan ken agpada dagitoy a residente iti nasao met laeng a barangay.
Basar iti inisyal nga imbestigasion ti Laoag City Police Station, kabayatan a magmagna ti biktima nga agawiden ket kellaat a simmabat ti suspek ket inbagkongna ti kutsilyo nga iggemna iti buksit ti biktima rason iti pannakatulidna.
Gapu iti daytoy, insigida nga immarayat dagiti kabagian ti biktima ngem inlayat ti suspek ti natadem a banag nga iggemna isu a nakataray ti suspek nga agpa-abagatan nga intugotna ti banag nga inusarna iti krimen.
Naitaray ti biktima iti Gov. Roque B. Ablan Senior Memorial Hospital ngem naideklarar a pimmusayen.
Mainaig iti daytoy, segun iti kaanakan ti biktima nga adda ti panagkinnarit iti nagbaetan ti biktima ken suspek sakbay ti insidente.
Kunana a nakitada a rimmuar ti bagis ti biktima ken addaan ti nauneg nga iwa ti akinkannigid nga imana.
Inlawlawagna a ti biktima ket na-paralyze iti gudua ti bagi na.
Kabayatanna, inpakaammo ni Barangay Chairman Johnny Duldulao ti Barangay 32-A Lapaz a pasado alas diyes ti rabii idi immasideg dagiti annak ti suspek kenkuana tapno ipakaammo nga agboluntario a sumuko ti suspek ken inkiddawda a bayabayanda nga agturong iti kuerpo ti pulisia.
Basar kadagiti otoridad nga agarup 11:30 idi rabii ket simmuko ti suspek ken nakumpiskar ti kitchen knife nga agatiddog ti sumurok-kumurang 12 a pulgada.
Naammoan a ti biktima ken suspek ket agabirat ken agasideg ti pagtaenganda.
Iti agdama, nagtalinaed iti pagbaludan ti suspek ken agtultuloy ti maiwaywayat nga imbestigasion.
