LAOAG CITY – Pimmusay ti maysa a senior citizen kalpasan nga imminom ti insektisidio iti Brgy. Baoa West iti siudad ti Batac.
Segun ken ni Police Lieutenant Colonel Adrian Gayuchan, ti Hepe iti Philippine National Police iti nasao a siudad, nabigbig ti biktima a ni Dionicio Palada Jr. y Ronduen, agtawen ti 68, naasawaan ken residente iti nadakamat met laeng a barangay.
Inbatadna a basar iti insayangkatda nga imbestigasion ket nakita ti maysa kadagiti apoko ti biktima a ni Kenneth Palada y Bucao, agtawen ti 23, mannalon ken residente iti nasao met laeng a barangay ti lulona nga awanen ti biagna rason a dagus daytoy a napan dimmawat ti tulong kadagiti kaarrubana.
Inlawlawagna a naripar ni Palada nga adda ti transparent plastic container a naglaon ti Lanit pesticide nga agmaris ti asul iti asideg ti bagi ti biktima a maipagarup nga ininomna a nangitunda ti pannakatayna.
Mainaig iti daytoy, inpakaammo ni Police Lieutenant Colonel Gayuchan nga adda ti dinakamat ti biktima iti pamiliana no sadino kinunana nga adda ti supresana kadakuada.
Nupay kasta, kunana a saan met nga inpagarup ti maseknan a pamilia a daytoy ti supresa a dakdakamaten ti biktima.
Inpalgakna a saanen a dimmanon a sibibiag ti biktima idi naitaray iti ospital basar iti panangkumpirmar ni Dr. Celeste Abundo, ti mangidadaulo ti City Health Office iti siudad ti Batac
Inbatadna a saanna pay a masinunuo no kasano kaadu ti nainom nga insektisidio ti biktima.
Innayonna a makapaspasar ti despresyon ti biktima gapu ta agsagsagaba daytoy ti nakaro a sakit a gout.
Kabayatanna, naammoan a daytoy ti umuna a daras nga inaramid ti biktima ti nasao nga insidente ken awan ti foul play a napasamak.
