LAOAG CITY – Kalikagom dagiti senior citizens iti Brgy. 21 ditoy ciudad ti Laoag ti matudukan iti anti-flu vaccine.
Daytoy ti inpakaammo ni Konsehal Jeff Farinas iti kabayatan iti District Sanggunian Report iti naiwayat a regular session iti konseho ditoy ciudad.
Inbatad ni Farinas a daytoy ti kangrunaan a kiniddaw kenkuana dagiti senior citizens iti ibibisita na iti nadakamat a barangay gapu ta naibusen ti anti-flu vaccine iti lugar.
Mainaig iti daytoy, nagkamang ni Farinas iti City Health Office nga idaulwan ni Dr. Joseph Adaya tapno agkiddaw ti bakuna para kadagiti residente ti Barangay 21 ditoy ciudad.
Nupay kasta, naamoan ni Farinas nga uray ti suplay ti gobierno ditoy ciudad a flu vaccine iti tawen 2022 ket naibus payen.
Kabayatanna, inpakaammo ti opisyal a ti suplay a flu vaccine ditoy ciudad para ita a tawen 2023 ket saan pay a naawat iti city government.
Inkari ti konsehal nga apaman a maawat da ti nasao a bakuna ket mangited da a dagus iti nadakamat a barangay.
