LAOAG CITY – Inlawlawag ti Korte Suprema a mabalin a pilyen dagiti senior citizens ti dakdakkel a diskuwento iti nagbaetan ti regular a 20% senior citizen discount ken promotional discount nga ididiaya dagiti establisimyento.
Iti desisyon, inrakurak ti kangatoan a korte a saan a mabalin a paggiddanen ti dua a diskuwento wenno mangipaay ti nayun a 20% discount iti presyo a nakissayanen gapu iti promosyon.
Naibasar daytoy iti Republic Act No. 9994 wenno Expanded Senior Citizens Act of 2010, a mangipapaay ti 20% discount kadagiti kwalipikado a produkto ken serbisyo para kadagiti Pilipino nga agtawen ti 60 agpangato.
Iti babaen ti linteg, no adda ti promotional discount ti maysa a produkto wenno serbisyo, mabalin a pilyen ti senior citizen ti diskuwento nga ad-adda a pabor kenkuana.
