LAOAG CITY – Naragsak nga inpakaammo ni Sangguniang Panlungsod Member Handy Lao ditoy siudad ti Laoag ti posible a pannakaipaay ti maysa a ribu a pisos para kadagiti senior citizens nga agtawen iti 70 agingga 79 tunggal agkasangayda.
Segun kenkuana, manamnama a mangrugi ti pannakaipatungpalna daytoy nga ordinansa inton Enero 1, 2025 apaman nga aprobaran ti Sangguniang Panlungsod ti maikatlo ken maudi a pannakaibasana inton sumaruno a pannakaiyuswat ti regular session.
Inbatadna nga adda ti mailatang a lima a milyon a pisos iti tunggal tawen no bilang naan-anay a maaprobaran iti konseho.
Inlawlawagna a babaen iti daytoy a wagas ket mabigbig dagiti sakripisio ken kontribusion dagiti senior citizens ditoy siudad ti Laoag.
Mainaig iti daytoy, kunana nga apaman a madanon dagiti senior citizens iti tawen a 80 ken agpangato ket manayunan ken dakdakkel ti maawat dagiti maseknan a tulong pinansial.
Innayonna a ti mailatang a pundo ket manipud iti lokal a gobierno ditoy siudad ti Laoag a dakkel a pakabenepisiaran dagiti senior citizens.
Immuna iti daytoy, inaprobaran ti Sangguniang Panlungsod ti ordinansa pakaseknan iti panangipaay ti tulong pinansial kadagiti senior citizens nga agtawen iti 80 agingga a madanonda iti 100.
