LAOAG CITY – Kiniddaw ni Senior Citizens Partylist iti Department of Budget and Management (DBM) nga ikkan ti konsiderasyon ti funding requirements ti National Commission of Senior Citizens (NCSC).
Daytoy ket mainaig iti agtultuloy a panagado dagiti senior citizen iti pagilian, nga umaboten iti sumuruk-kumurang a 12 a milyon iti agdama.
Inpila ni Senior Citizens Partylist Representative Rodolfo “Ompong” M. Ordanes ti apela kabayatan ti deliberasyon ti Kongreso para iti nailungalong a budget ti Department of Social Welfare and Development (DSWD).
Segun ken ni Rep. Ordanes, gagem ti kiddaw a pondo a naan-anay a maipaay ken maibunong ti benepisyo dagiti unfunded grantees ti Expanded Centenarians Act.
Karaman ditoy dagiti simrek iti kwalipikado a tawen para iti programa sipud pay idi 2024.
Inpetteng na nga agtultuloy paylaeng ti panangusar kadagiti pondo a nailatang iti tawen 2025 ken 2026 tapno in-inot a mabayadan dagiti nabatbati a benepisyaryo a saan pay a nakaawat iti maiparbeng a cash gifts da.
Mainaig iti daytoy, pinapigsa pay ti party-list ti panawagan para iti NCSC Digitalization Program.
Ti nasao a programa ket agbalin a napateg a paset iti panangipatungpal ti Elderly Data Management System para iti pakabuklan nga alokasyon ti ahensya.
Inlawlawag ni Ordanes a kasapulan ti pagilian ti maysa nga integrated ken secure system tapno mapasayaat ti proseso ti validation, maliklikan ti duplication ti nagan, mapalisto ti koordinasyon iti nagduduma nga ahensya, ken masigurado ti alisto a panangipaay ti benepisyo.
