LAOAG CITY – Linukatan ti Civil Service Commission (CSC) ti ridaw ti gobyerno para kadagiti senior high school graduates, kalpasan nga inbaba na ti educational requirement para iti first-level positions kas ti clerical, custodial, trade, ken craft jobs.
Iti bileg ti Civil Service Commission Resolution No. 2500229 a naipasa idi Marso 6, mabalin a makastrek kadagiti sub-professional a trabaho iti gobyerno dagiti nagturpos iti Grade 10 wenno Grade 12, kagiddan ti pannaka-align ti standard ti K to 12 curriculum ti pagilian.
Ti baro a pagannurutan ket saan a sakopen dagiti posisyon nga agkasapulan ti naan-anay a degree wenno lisensya iti propesyonal.
Karaman dagiti baro a kwalipikasyon ket ti dati nga high school diploma, Grade 10 finishers manipod 2016 agpangato, Grade 12 graduates iti TVL track wenno Grade 10 + TESDA NC II a dati ket kasapulan na ti vocational training wenno dua a tawen a panagadal iti kolehiyo.
Inlawlawag ti Civil Service Commission a saan nga umdas ti edukasyon laeng; masapol a pumasa met ti aplikante iti dadduma a requirements kas ti training, work experience, ken civil service eligibility.
Ti pinal a desisyon ket adda metlaeng iti hiring agency ti aplikante.
Agbalin nga epektibo ti baro a pagannurutan 15 nga aldaw kalpasan a maipublikar iti Official Gazette wenno dagiti pagiwarnakan.
