LAOAG CITY – Indauloan ni Senior Sang. Panlalawigan Member Matthew Joseph Marcos Manotoc ti naisayangkat a “pig” ken “chicks dispersal” idiay ili a Pasuquin.
Naiyuswat daytoy iti mismo a “breeding center” ti Provincial Veterinary Office idiay Brgy. Nalvo iti nadakamat nga ili.
Inbunannag ti bokal nga umabot iti 10 a “native” ken “upgraded” a burias ken 170 a “upgraded chicks”.
Malaksid kadagitoy, adda pay dagiti vitamins a para kadagiti baboy ken manok a naibunong.
Kabayatanna naigiddan iti nasao nga aktibidad ti panangisayangkat ti PVET iti veterinary mission.
Inlawlawag ni Provincial Veterinarian Dr. Loida Valenzuela a ditoy a nagbakuna da kadagiti an-animal tapno agbalin dagitoy a naresresistansia iti ania man a sakit.
Innayonna a naruay met nga umili idiay Pasuquin ti nangiyasideg kadagiti taraken da para iti pannakabakuna da.
