LAOAG CITY – Ar-aramiden ti gobierno probinsial dagiti amin a wagas a mangisigurado a maiyadayo dagiti taraken a baboy ditoy probinsia manipud iti sakit nga African Swine Fever wenno ASF.
Segun ken ni Provincial Veterinarian Dr. Loida Valenzuela, iti agdama naiget a maipatpatungpal ti “sentinelling program” ditoy Ilocos Norte.
Inbatadna nga adda ti part 1 ken part 2 ti nasao a programa ti Departamento ti Agrikultura.
Inlawlawagna nga iti babaen ti nasao a programa ket adda ti maipaay a tallo a burias ken feeds a makaumanay a kanen dagiti burias iti uneg ti uppat a pulo nga aldaw.
Inpalgakna a sakbay a maiyawat dagiti burias kadagiti agtaraken ket ma-test nga umuna dagiti burias ken kalpasan iti uppat a pulo nga aldaw ket ma-test manen dagitoy.
Kunana nga iti umuna a bansada idi tawen 2022 ket adda ti maysa a nagsakit ngem babaen iti naiget a monitoring nga isaysayangkat ti Provincial Veterinary Office ket dagus a nakontrol.
Inbunannag ni Valenzuela nga iti daytoy a tawen 2023 a pannakaipatungpal ti part 2 ti nasao a programa ket manarimaan manen ti panagkolektada ti dara a maisubmitir iti regional diagnostic laboratory ken maipauli iti laboratory idiay Manila.
Inannugot nga adu pay ti pagdalanan a proseso sakbay a maideklarar nga African Swine Fever free ti Ilocos Norte.
Nupay kasta, inpatalgedna nga awan sarday ti Provincial, City ken Municipal Veterinarian League of the Philippines a makikamkammayet iti gobierno nasional tapno maiyurnos ken ad-adda pay a mapasayaat dagiti administrative order nga adda pakainaigan ti pananglaban iti African Swine Fever.
