LAOAG CITY – Inbatad ni Education Secretary Sonny Angara a naitantan ti serrek dagiti pagadalan a kangrunaan a naapektaran ti abagat ken Bagyo Carina.
Inlawlawag ni Angara a gagem ti nasao nga addang ket tapno maikkan da ti gundaway dagiti nasao a pagadalan para iti cleanup operations ken rehabilitasyon.
Inpakaammo ni Angara nga iparuk-at na ti listaan dagiti pagadalan a maipostpone paylaeng ti serrekna ngem dagiti saan a napakarwan ket mangrugin ti klase da intono Lunes, Hulyo 29 ita a tawen.
Kuna pay ni Angara a dagiti regional directors ket mki-koordinar kadagiti school principals tapno I-assess da no naan-anayen a nakasagana dagiti idaulwan da a pagadalan.
Innayon na a saan da a piliten dagiti pagadalan nga aglukaten intono Lunes no saan pay a naan-anay a nakasagana gapu iti epekto ti kalamidad.
Mainaig iti daytoy, inrakurak ti Department of Education nga umabot iti 324 a pagadalan ti nausar kas evacuation centers iti iduduprak ti bagyo Carina iti pagilian.
Iti datos ti Department of Education, adda ti 90 a pagadalan a nadadael gapu iti iduduprak ti bagyo Carina ken epekto ti abagat.
Ti siyam a rehiyon nga addaan ti nadadael a pagadalan ket pakairamanan ti Cordillera Administrative Region, National Capital Region, Region I, Region II, Region III, Region IV-A, Region IV-B, Region VI ken Region VIII.
Mapatta-patta nga umabot iti 630 a milyon a pisos ti mausar para iti rehabilitation ken reconstruction kadagiti nadadael a pagadalan.
