LAOAG CITY – Inpakaammo ni Atty. Arnedo Valera, iti Washington D.C. iti Estados Unidos a nasuspenso ti regular session ti Kongresso iti US Capitol gapu iti pangta iti panagraot dagiti Trump supporters.
Kuna na a possible a namunganay ti panagalerto dagiti otoridad a bantayan ti US Capitol gapu iti conspiracy theory no sadino a ti petsa a Marso 4 ket maipagarup nga adda ti maiyuswat nga inagurasyon ni dati a Presidente Donald Trump.
Segun kenni Atty. Valera, ti pakasaritaan ti petsa a Marso 4 iti Estados Unidos mainaig iti pannakaiyuswat ti presidential inauguration idi Marso 4, 1793 ken tawen 1933 ngem naamendaran ken naiyakar daytoy iti Enero 20.
Inbatad na nga inpagarup dagiti maseknan nga adda ti maiyuswat nga inagurasyon ni Trump rason a naka red alert dagiti amin a law enforcement agencies iti Amerika.
Kuna na a saanen a kayat dagiti otoridad a mapasamak ti insureksiyon kas iti panangraot dagiti Trump suppoters ti US Capitol idi Enero 6 sakbay ti inagurasyon ni Presidente Joe Biden.
Kalikagum kuma dagiti agpanpanday linteg a matratar ti nailungalong a 1.9 trillion dollars a COVID-19 relief stimulus package ita nga aldaw ngem gapu ti pangta ket nasuspenso ti sesyon iti Kongresso.
Para kenni Atty. Valera, nupay maibilang nga imahinasyon daytoy ket adda ti posibilidad a mapasamak daytoy gapu ta adda dagiti maibilang ken maipagarup nga extremist a mangsupsuporta kenni Trump a kabaelan na a mangaramid kas iti napasamak idi Enero 6.
Inbunannag na nga adda pay ti imbestigasyon a maiyus-uswat kadagiti miembro iti Senado ken Kongresso a maipagarup nga adda dagiti timmulong a direkta wenno saan a direkta, kadagiti rioters a naggandat a sakopen ti Capitol iti kallabes.
Innayon ni Atty. Valera a kalikagum dagiti investigators nga ammuen ti nagbalin nga akem dagiti maipagarup a miembro dagiti dua a pagpandayan linteg kadagiti rioters iti Estados Unidos.
