LAOAG CITY – Inrakurak ni SFO1 Victor Apostol Caise iti BFP-Laoag ti panagbabawi na seknan iti maipagarop a panaggi-inum da iti uneg ti opisina da kadwa na ni SFO1 Charlie Balanay Simisim a naaktuan a mismo ni Fire Chief Insp. Roxane Parado.
Segun kenni Caise, saan nan a kayat nga umatiddog daytoy nga isyu isut gapo na a saan pay laeng nga agkomento ti ado mainaig iti maipagarop a panaggi-inum da.
Kunana nga ilanad nan to laeng ti pudno a napasamak ken no anya man ti rumbeng a masungbatan no addan to ti proper forum seknan iti daytoy.
Inlawlawag na a masapol a maurnos ti amin ken nakasagana nga agsarita no mapaayaban.
Mainaig iti daytoy, kuna ni Caise a saan na a mailawlawag iti Bombo Radyo no anya ti rason da a naggi-inum iti opisina da ken kunana a nabara iti uneg ti opisina da rason a naka t-shirt laeng.
Maipalaigip a naaktuan a mismo ni Parado da Caise ken Simisim nga agin-inom ti nasanger ken maipagarop a ginandat ni Simisim a dangran ti hepe da.
Kabayatanna, kuna ni Caise a saan nga isuna ti rumbeng nga agsao seknan iti maipagarop a panagsinnungbat da Parado ken Simisim.
Kabayatanna, inrakurak ni Provincial Fire Marshal Superintendent Floro Obrero a naawat nan ti report manipud iti BFP Laoag seknan iti panaggi-inom da Caise ken Simisim.
Segun kenni Obrero, gapo iti daytoy ket mangiyuswat da ti imbestigasyon ken agpalawag dagiti maseknan iti daytoy.
Inlawlawag na a no mapaneknekan a nagbasol dagiti dua a BFP personnel ket adda ti maiyannatop a pannusa para kadagitoy kas iti administratibo ken grave misconduct.
Karaman pay iti maimbestigar ket ti saan a panagisuot ti uniporme da Simisim ken Caise bayat a nakaduty da.
Kabayatanna, kuna ni Obrero a daytoyen ti maikadwa a gundaway a naireklamo ni Simisin seknan met laeng iti panaginom ti nasanger bayat a nakaduty.
