LAOAG CITY – Maitantan ti Seal of Good Local Governance wenno SGLG Assessment ita a tawen.
Segun kenni Atty. Gerald Gallardo, Provincial Director iti Department of the Interior and Local Government ditoy probinsya, maisayangkat ti recalibration wennu possible a manayunan dagiti pagbasaran dagiti ma-awardan a lokal a gobierno.
Kunana nga iti agdama ket adda ti sangapulo a governance area a pagbasaranda ngem possible a manayunan ken makissayan daytoy.
Mainaig iti daytoy, inlawlawag ti nasao nga ahensya a gagem ti nasao nga addang a masuportaran ti long-term solution a saan laeng a pang-compliance.
Kalikagom da a mapapintas ti funding mechanism para ti patas ken ad-adda nga epektibo a distribusyon.
Manipod iti annual assessment possible daytoy nga agbalin a term-based assessment tapnu maibatog iti termino dagiti local chief executive.
Maipalagip, a ti Seal of Good Local Governance ken maysa nga institutionalized incentive, honor ken recognition-based program ti Department of the Interior and Local Government para kadagiti Local Government Unit.
