LAOAG CITY – Inbatad ni Barangay Chairman Elviro Agoo iti Barangay Davila iti ili ti Pasuquin a naisumitir dan iti opisina ni Congressman Sandro Marcos ti pinirmaan da a signature campaign kontra iti kuryente ti Ilocos Norte Electric Cooperative (INEC).
Daytoy ket gapu iti nangina unay a singir iti kuryente a padagsen saan laeng a kadagiti residente iti nadakamat a barangay no di ket iti intero a probinsya.
Inlawlawag ni Agoo a makaammon iti opisina ti kongresista nga agimbestigar iti daytoy a banag.
Inpakaammo pay ni Agoo nga uray dagiti dadduma a barangay iti ili ti Pasuquin ket mangiyuswat da ti signature campaign kontra iti nasao a kooperatiba.
Mangnamnama ti kapitan a babaen iti addang da ket maisubli ti sigud a rate ti kuryente ditoy probinsya tapno malag-anan dagiti member-consumers ti INEC.
