LAOAG CITY – Nagpalagip ni Most Reverent Bishop Renato Mayugba, ti Diocese of Laoag kadagiti umili na mapan agatendar ti Simbang Gabi a liklikanda ti agaruat kadagiti nakikiting a bado iti uneg ti simbaan wenno ti makunkuna a “revealing clothes”.
Segun kenkuana, maobserbaran na a kabayatan a bumaybayag ti panawen ket mapukpukawen ti disiplina dagiti tattao iti uneg ti simbaan.
Inbatad ni Bishop Mayugba nga ikkan ti respeto ti simbaan ken ti Dios babaen ti usto a panagbado.
Kuna na, bassit man a banag daytoy ngem dakkel ti maipakitana a disiplina iti sangwanan ti Dios.
Innayon na nga igetanda pay ti panagusar ti gadgets kas ti cellphone kadagiti agturong iti simbaan.
Mainaig iti daytoy, inpakaammo ni Most Reverent Bishop Mayugba a mangrugin ti Simbang Gabi inton Disiembre 16 ken malpas intono Disiembre 24 iti oras ti alas kuatro iti parbangon.
Inlawlawag ni Most Reverent Bishop Mayugba nga awan ti dakesna no saan a makumpleto ti siyam a misa.
Nupay kasta, ket ginutigotna dagiti Katoliko a saanda nga agpaatiw ti sulisog tapno makumpletoda ti siyam nga aldaw a Simbang Gabi.
Kabayatanna, naammoan a maisayangkat iti kaunaan a gundaway ti Simbang Gabi idiay pagilian a Roma nga idauloan a mismo ni Pope Francis.
