LAOAG CITY – Umabot iti 15 agingga iti 20 a porsiento ti ngimmatoan dagiti nagsangpet iti Laoag International Airport a turista ken balikbayan.
Segun ken ni Mr. Ronald Estavillo, airport manager ti LIA, nadlawan ti iyaadu dagiti nagsangpet ken pimmanaw ditoy probinsia a naglugan iti eroplano iti maudi a lawas ti bulan ti Nobiembre.
Imbatadna nga amin nga agsangpet ken pumanaw nga eroplano iti LIA ket napunpunno.
Mamati a daytoy ket gapu iti kaadu dagiti immay nagbakasyon ditoy Ilocos Norte iti panawen ti paskua.
Inlawlawagna nga agtultuloy pay laeng ti kaadu dagiti agsangpet ken pumanpanaw nga eroplano iti erupuerto.
Mainaig iti daytoy, kuna ni Estavillo nga adda dagiti gundaway nga adda dagiti mainayon a “flights” tapno laeng maakomodar amin a pasaheros nangnangruna kadagiti gundaway nga adda dagiti makanselar a “flights”.
Mangnamnama nga agtultuloy ti kaadu dagiti agsangpet nga umay bumisita wenno agpasiar ditoy Ilocos Norte.
