LAOAG CITY – Simple a graduation iti amin a pampubliko a pagadalan ti namnamaen ti liderato ti Department of Education (DepEd) no sadinno a saan a kasapulan ti nagarbo a programa ken awan ti kasapulan nga “invited guest” a mangpabayag a programa a nakailatang laeng para kadagiti estudyante nga agturpos ita a bolan.
Inpalagip pay ti Department of Education a saan a kasapulan a pagbalinen a “political forum” ti graduation ceremony isut gapuna a saan a rumbeng nga agimbitar kadagiti politiko wenno dagiti barangay official gapu iti naituding a barangay elections, a mangpayag laeng iti programa ti panagturpos ti school year 2022-2023 nga addaan ti tema a “Gradweyt ng K to 12: Hinubog ng Matatag na Edukasyon.”
Basar iti guidelines ti Department of Education, naituding ita nga Hulyo ti moving up ceremony dagiti agad-adal iti kindergarten, grade 6, grade 10 ken grade 12 no sadinno a saan nga obligado ti panagsuot ti face masks ken saanen a naiget ti physical distancing gapu ta addan iti bisita, nagannak, agad-adal ken mangisursuro ti desisyon no kayat da a salwadan ti bukod da a bagi kontra iti paggaadwan ti tattao.
Nangiparuk-at pay ti guidelines ti Department of Education kas pammalagip ken panangipaay ti “go signal” iti amin a pribado a pagadalan nga umanaong da iti nasapa a face-to-face a moving up ken graduation ceremony.
Naiget a nagpalagip ti Department of Education a dagiti non-academic projects a kas ti attendance iti field trips, film showing, JS Promenade ken dadduma pay nga school events ket saan a maibilang a requirement iti panagturpos.
