LAOAG CITY – Maiyuswat ti simultaneous comelec checkpoint apaman a madanun ti tengnga ti rabii iti Enero 9 ita a tawen ditoy probinsya kas pormal a panangrugin ti comelec gun ban kas paset ti panagsagsagana iti mapaspasangasangan a May 2022 elections.
Daytoy ti inpakaammo ni Police Major Jephre Taccad, ti pannakangiwat ti Ilocos Norte Police Provincial Office (INPPO).
Inbatad na a kadwa ti PNP a mangiyuswat ti checkpoint ti comelec officers ken aginspeksyon ti provincial command iti panangidaulo ni Provincial Director Police Col. Christoper Abrahano.
Inlawlawag ni Taccad a masapol nga adda latta ti mangibagi iti comelec tunggal mangiyuswat ti PNP ti checkpoint.
Nupay kasta, kuna na a no awan ti mangibagi iti comelec ket rumbeng a maipakada iti ahensya no adda ti iyuswat a checkpoint ti PNP.
Innayon na a nasken a maibaga amin iti Comelec ti eksakto a lokasyon a pakaiyuswatan ti checkpoint ken no adda ti matiliw ket maireport a dagus iti ahensya.
Mainaig iti daytoy, kuna ni Taccad a kas ti naipagagangayen a maar-aramid ket no aginspeksyon ti PNP kangrunaan na iti 4-wheel vehicle ket masapol nga ibaba laeng ti driver ti tawa ken saan a bumabbaba, lukatan na ti silaw iti uneg ti lugan ken ipakita na ti lisensya ken OR-CR na.
