LAOAG CITY – Balligi a naiyuswat ti Simultaneously Earthquake Drill idi laeng kalman iti Laoag City Hall, Aurora Park ditoy siudad ti Laoag.
Inpakaammo ni Mayor Michael Marcos Keon, iti agdama a kakasaad ti lubong ket ado dagiti saan a mapakpakadaan no maipapan iti paniempo ken natural disasters.
Innayonna a napateg ti panagsanay ken pannakaipatungpal ti simultaneous earthquake drill tapno nakasagana dagiti Laoagueños iti aniaman a didigra.
Segun kenkuana, maisayangkat ti sumaruno a drill iti Public Market ken kadagiti pagadalan tapno ad-adda a mapalawa ti panagsagana ti komunidad.
Kabayatana, kinuna ni Dr. Melvin Manuel, mangidadaulo ti City Disaster Risk Reduction Managemnet Office, a nakasagana ti siudad ti Laoag para iti aniaman nga umay a didigra gapu iti tulong ti Simultaneous Earthquake Drill.
Innayonna a napateg ti nasao nga aktibidad tapno maisagana dagiti Laoagueños iti aniaman a natural a kalamidad.
Kabayatanna, babaen ti agtultuloy a panagsanay ken aktibo a pannakipaset ti komunidad, panggep ti siudad a mataginayon ti kinatalged ken panagsagana ti tunggal maysa maibusor kadagiti saan a namnamaen didigra.
