LAOAG CITY – Balligi a naisayangkat ti Simultaneously Earthquake Drill iti Laoag City General Hospital wenno LCGH ditoy siudad ti Laoag.
Segun ken ni Dr. Melvin Manuel, mangidadaulo ti City Disaster Risk Reduction Management Office ditoy siudad, napateg ti panagsanay ken pannakaipatungpal ti simultaneous earthquake drill tapno kanayon a nakasagana iti aniaman a didigra a sumangbay.
Inbatadna a rumbeng a dagiti kangrunaan a dumalan iti panagsanay ket dagiti health practitioners tapno ad-adda nga ammoda ti ar-aramidenda iti panangisalakan kadagiti biktima wenno pasiente.
Mainaig iti daytoy, kunana a dagiti ospital ket nasken a mapadur-as ken mapakaammoanda pay ti nasao a banag tapno napaspaspas ti pannakaipadanon ti serbisio medikal kadagiti pasiente.
Naammoan a maisayangkat ti sumaruno nga earthquake drill iti Laoag City Public Market and Comercial Complex ken kadagiti pagadalan tapno ad-adda a mapaigetan ti panagsagana ti komunidad.
