LAOAG CITY – Nagpalagip manen ti Department of Health–Metro Manila Center for Health Development (DOH-MMCHD) iti publiko a saan a baybay-an ti sintomas ti tuberculosis ket agpa-early screening tapno malappedan ti panagwaras ti sakit ken maisalakan ti biag.
Daytoy ket kagiddan iti pannakaselebrar ti World TB Day.
Basar iti datos ti Epidemiology Bureau, adda ti 101,807 a tuberculosis cases a nairekord iti National Capital Region (NCR) agingga idi Pebrero 16.
Gapu iti daytoy, pinaigetan ti Department of Health–Metro Manila Center for Health Development ti efforts iti nasapa a detection, umno a panangagas ken prevention.
Nabalakadan dagiti addaan ti sintomas kas ti uyek nga agpapaut ti dua a lawas wenno nasursurok pay, panagsakit ti barukong, gurigor, panagkapsot, panagleng-et iti rabii ken saan a maipalawag a panagbaba ti timbang nga insigida nga agpakonsultar iti kaasitgan nga health center.
Naammoan nga idi 2025, sumurok 3.1 milyon iti National Capital Region ti na-screen kas paset ti expanded case-finding efforts.
Available met ti free diagnostic testing ken kumpleto a panangtaming kadagiti pampubliko nga health facilities.
