LAOAG CITY – Inlawlawag ni Mr. Willie Jake Sib-at, ti mangimanmanihir ti Sirib Scholarship Program nga awan dagiti scholars ti probinsia a saan a residente ditoy.
Segun kenkuana, iti uneg ti sumagmamano a tawen a panangimanihir na iti programa ket masigurado na nga amin dagiti scholars ket residente ditoy probinsya gapu ta naiget ti panangarisit da kadagitoy, kas ti panangkita da ti government Identification Card wennu certificate of residency, ken masapol nga addan ti 6 a bulan nga agnanaed da ditoy probinsia.
Innayon na a narigat ti mangala ti valid government ID no nabiit pay nga agnanaed ditoy probinsia kas estudyante isut gapuna a ti pagibasaran da ket ti government ID a pakakitaan ti address da.
Namunganay daytoy kalpasan a kwinestyun ni spm franklin respicio ti 6 months recidency period bayat ti panangipresentar ni Sib-at ti ordinansa maianig iti sirib scholarship.
Kabayatanna, inbatad ni bokal Saul Lazo, chairman ti Committee on Education ditoy probinsia a saan a dakkel a problema ti residency gapu ta ti nasao nga scholarship program ket para kadagiti kwalipikado a kayatna ti agadal ditoy probinsia ken agrender ti community service iti provincial government.
