LAOAG CITY – Kinumpirmaran ni Barangay Chairwoman Marvelyn Padayao iti Barangay 37-A, Calayab ditoy ciudad ti Laoag a mailockdown ti Sitio 2 iti barangay da.
Daytoy ket kalpasan nga inpakaammo ti City Health Office (CHO) nga adda ti kaso ti covid-19 iti barangay da.
Segun kenni Padayao, ti indibidwal ket maysa a senior citizen ken simmangpet ditoy probinsya idi Enero ita a tawen ken agsubli kuman iti ballasiw taaw iti ummuna a lawas ti Agosto.
Inlawlawag na a napan nagpaswab test iti ospital iti ciudad ti Batac ti maseknan kas panangsurot iti protocol gapo ta agsubli idiay Hawaii.
Kunana a burburtya para kadakuada no sadinno ti nakaalaan ti maseknan no pudno a positibo ngem nabalakadanen daytoy ken ti asawa na a saan a rumwar.
Ummuna iti daytoy, kinumpirman pay ni Padayao a naglugan ti maseknan iti multicab ti barangay ken nakaluganan da dagiti dua a napan nagatendar ti seminar, ti barangay treasurer ken dadduma pay.
Malaksid iti daytoy, kuna ti kapitan nga adda ti dumandanon kenkuana a report a ti nasao nga indibidwal ket napan naki-tienda iti ili ti Bacarra sakbay a nagpaswab test.
Kabayatanna, manarimaan met ti contact tracing da tapno mabigbig dagiti nakapulapol daytoy.
