LAOAG CITY – Nagtalinaed a saan a malasatan ti anyaman a lugan iti Brgy. Pancian iti ili ti Pagudpud gapu pay laeng ti problema a paspasaren da kalpasan a nagreggaay ti daga iti sitio Banquero.
Daytoy ti inpakaammo ni Barangay Kagawad Jay-Z Lagundino, iti nasao a lugar.
Inbunannag na pay nga adda ti pakaammo ti DPWH a maipalubos a pagnaen dagiti tattao iti nagaburan a kalsada iti alas-sais agingga iti alas-siete ti bigat wenno maysa nga oras a pawayway, kasta met iti alas-dose ti aldaw agingga iti ala-una ti malem ken alas-singko ti malem agingga iti alas-sais ti rabii.
Kuna na a kalpasan ti maysa nga oras a panaginana dagiti otoridad ket maituloy ti clearing operation.
Inlawlawag na a narigat pay laeng a makadalyasat dagiti motorsiklo gapu ti sitwasyon.
Mainaig iti daytoy, adda ti maysa a residente iti Cagayan a nagpatulong kenkuana a maiballasiw kuma gapu ti panagpaopera iti baton na.
Immabot pay ti 50 agingga iti 60 a pasahero dagiti limmasat idi kalman.
Mangnamnama ni Lagundino a kadagiti sumarsaruno nga aldaw ket mawaknitan ti kalsada.
Mainaig iti daytoy, awan pay ti kuryente da iti nasao a lugar kalpasan a nadadael dagiti poste ken linya ti kuryente.
Nupay kasta, innayon ni Lagundino a nakadanunen dagiti suplay para iti inaldaw nga usaren dagiti residente.
