LAOAG CITY – Kinumpirmaran ni Mayor Cresente Garcia iti ili ti Burgos nga adda ti siyam a bolan a maladaga a pimmusay gapu iti maipagarop a sakit a dengue iti Barangay Buduan iti nasao nga ili.
Iti eksklusibo nga interview ti Bombo Radyo Laoag, inbatad ti mayor a ti mangtartaraken ti biktima ket ti lola na gapu ta napan nagtrabaho idiay Metro Manila ti ina na.
Inlawlawag met ni Miss Beatriz Abian, municipal health nurse, idi napan inpakita ti lola ti maladaga iti Rural Health Unit (RHU) ket nangato ti gurigor na isut gapuna a pinagtumar da.
Nupay kasta, saan latta a bumaba ti gurigor ti ubing isut gapuna nga insingasing da a mapanda ikabil iti ospital ngem nagkedked ti baket gapu ta awan ti mangaywan ti maysa pay nga apoko na nga agtawen ti lima.
Kuna pay ni Abian a kiniddaw ti baket a mapanda lattan ipakita ti apoko na ken ni Doctor Garvida nga isu ti inaramid da, ngem inbalakad ti doktor a no madi latta ti ubing agsubli da ti kabigatan na ngem saan da a nagsubsubli.
Innayon na nga idi napanda pinasyar ti maladaga ket nakita da a delikadon ti sitwasyon na ngem nagkedked latta ti lola na a maipag iti ospital.
Gapu ti daytoy, napanda innala ti ambulansya ket inpan da lattan ti ubing iti ospital nga isun ti nakatayan na.
Kinumpirmaran ni Abian nga adda dagiti karruba ti biktima nga immunan a nagpositibo ti sakit a dengue isut gapuna a possible nga isu met ti inpatay ti nasao a maladaga.
Nupay kasta, kuna ni Abian a mapan da iti ospital tapno kumpirmaren no pudno a dengue ti inpatay ti nasao a maladaga.
