LAOAG CITY – Inbutaktak ti Commission on Elections (COMELEC) nga adda ti siyam a contractors ti nangipaay ti campaign donations kadagiti sumagmamano a kandidato iti 2025 midterm elections.
Segun kenni COMELEC Chairman George Garcia, awan pay ti kinumpirmaran da a kandidato no daytoy man ket mnaabak wenno nangabak ngem ti laeng dinakamat da ket umabot iti siyam a contractors ti nangted ti donasyon.
Daytoy a pannakadiskubre ket manipud iti inisyal a panagadal ti COMELEC.
Agtultuloy ti ar-aramiden a panagadal kadagiti statements of contributions and expenditures nga inpila dagiti 66 senatorial candidates ken dagiti 155 party-list groups.
Inbatad na nga ipaay da met ti pinala listaan dagiti contractors iti Department of Public Works and Highways (DPWH) tapno maadal sakbay a maipublikar.
Kabayatanna, nakalanad iti Omnibus Election Codes a maiparit nga agawat dagiti kandidato ti donasyon kadagiti kontratista nga addaan ti kontrata iti gobyerno.
