LAOAG CITY – Adda ti siyam a katulagan a napirmaan iti nagbaetan ti Pilipinas ken Qatar bayat ti ibibisita ni Qatari Amir Sheikh Tamim bin Hamad Al-Thani iti Malakanyang.
Segun iti Presidential Communications Office (PCO), napasamak ti signing kalpasan ti bilateral meeting da Presidente Ferdinand Marcos Jr.ken Al-Thani.
Karaman kadagiti pinirmaan a katulagan da Presidente Marcos ken Al-Thani ket adda ti pakainaigan iti waiver ti visa requirements para kadagiti holders ti diplomatic ken special wenno official passports, kooperasyon iti field of sports, field of youth ken pananglaban iti human trafficking.
Nagtulag pay ti dua a pagilyan para iti technical cooperation ken capacity-building mainaig iti climate change, tourism and business events, ken mutual recognition ti seafarers’ certificates.
Nagpirma pay ti Memorandum of Understanding ti Philippines Chamber of Commerce and Industry ken Qatar Chamber of Commerce and Industry idinto a napirmaan ti maysa a trade agreement ti Davao City Chamber of Commerce ken grupo dagiti negosyante iti nadakamat a pagilyan.
