LAOAG CITY – Kinumpirmaran ni Mayor Esterlina Aguinaldo iti Sta. Praxedes, Cagayan nga adda ti naistranded a siyam nga indibudwal a taga ditoy ciudad ti Laoag.
Segun kenni Aguinaldo, napan nakiminatay dagiti maseknan iti Barangay Portabaga, Sta. Praxedes idi Marso ngem naabutan da ti lockdown isut gapo na a nagtalinaed da iti nasao nga ili.
Inbatad na a gapo iti pannaka-stranded da iti nasao nga ili ket tumultulong nga agtalon tapno adda ti nayun a panggatang da ti kanen da.
Naamoan nga uray saan da a residente iti nasao nga ili ket maipapaayan da ti relief goods para iti inaldaw a panagbiag da bayat nga adda da iti nadakamat a lugar.
Inlawlawag na a gapo iti daytoy ket dimmawat ti tulong kenni Engr. Neil Jose iti Pugad Lawin ngem kasapulan ti Memorandum of Agreement (MOA).
Mainaig iti daytoy, kuna ni Aguinaldo nga inasikaso ti chief of police ti Sta. Praxedes ken nakisarita iti hepe iti ili ti Pagudpud ditoy probinsya tapno isuda ti makikoordenar iti lokal a gobierno ditoy ciudad ti Laoag ngem agpapan ita ket awan pay ti MOA, kasta pay a nakasarita na dagiti kapitan iti Barangay 56-A, Bacsil North ken Barangay 56-B, Bacsil South para iti panagawid da.
Iti agdama, kalikagom ni Mayor Aguinaldo a makaawiden dagiti nastranded a kaprobinsyaan gapo ta tallo kadagiti siyam ket menor de edad nga agtawen ti innem ken siyam, ken tapno saanen nga agrigat dagitoy iti ayan da.
Kuna ni Aguinaldo a ti laengen maiyur-uray ket ti agbalin a sungbat ti lokal a gobierno ditoy ciudad ti Laoag para iti panagawid dagitoy.
Malaksid kadagiti taga-ditoy ciudad ti Laoag ket adda pay ti tallo nga indibidwal a na-stranded a residente iti probinsya ti Pangasinan.
Kabayatanna, inlawlawag ni Engr. Neil Jose, mangidadaulo iti Pugad Lawin nga addan ti koordinasyon da kenni Mayor Esterlina Aguinaldo iti Sta. Praxedes, Cagayan seknan iti panagawid dagiti siyam a na-stranded a taga Barangay Bacsil ditoy ciudad.
Segun kenni Jose, ummunan a kiniddaw ni Aguinaldo nga ikuyog na dagiti siyam nga indidibwal no laketdi kumpleto ti dokumento da.
Nupay kasta, kuna ni Jose a nagpadespensar ni Aguinaldo gapo ta saan da a naipalpas ti dokumento dagiti indibidwal isut gapo na a saan na a naikuyog wenno nailugan nga agsubli ditoy ciudad idi nagturong isuna iti border ti Ilocos Norte ken Cagayan.
Inbatad na nga apaman a malpas dagiti amin a dokumento ket dagus da a mapan sukunen dagiti maseknan.
Naamoan ti Bombo Radyo Laoag manipud kenni Barangay Chairman Diosdado Pascual iti Barangay 56-B, Bacsil South a naipakammo da iti lokal a gobierno ditoy ciudad.
Innayon na nga iyur-uray da laengen ti panangaprubar ni Mayor Michael Marcos Keon dagiti dokumentos para iti panagawid dagiti siyam nga indibidwal.
