LAOAG CITY – Agtultuloy ti imbestigasyon dagti otoridad iti panagpabettak iti Delhi, India a nakatayan ti siyam nga indibidual.
Karaman kadagiti agim-imbestigar ket ti India’s National Security Guard, ken National Investigation Agency kasta met dagiti forensic experts.
Segun kenni Delhi City police spokesperson Sanjay Tyagi, malaksid kadagiti natay ket adda pay ti 20 ti nasugatan.
Basar iti inisyal nga imbestigasyon dagiti otoridad, narsadeng ti maysa a behikulo iti red light sakbay a bimtak partikular iti natao a lugar iti Red Fort area.
Inbatad pay ni Tyagi a ti nasao a behikulo ket nagkarga iti tallo nga indibidual.
Iti agdama ket naka-high alert ti Mumbai gapo iti napasamak.
Kabayatanna, nakipagladingit met ni India’s Prime Minister Narendra Modi iti pamilya dagiti biktima.
