LAOAG CITY – Siyam a tattao a kameng ti California drug trafficking ti natiliw gapo iti panagiserrek da ti maipagarop a shabu idiay Hawaii.
Daytoy ti inbatad ni Bombo International Correspondent Manny Pascua idiay Hawaii
Basar ti report, narekobre dagiti sumagmamano a kilo ti maipagarop a shabu babaen ti panangipatulod dagiti maseknan ti Fedral Express Store a nakabase idiay California.
Segun ti US Drug Enforcement Administration, ti grupo ket namin-dua a daras a nagibyahe da ti iligal a droga a mapan idiay Hawaii babaen ti panangideklara da a dekorasyon.
Inbatad na a dagiti siyam a kameng ti sindikato ket manamnama a sumango ti lima a tawen a pannakabalod wenno nangat-ngato pay.
Kunana a gapo iti iligal a droga idiay Hawaii ket adon dagiti Pilipino wenno Ilokano ti nadadael ti masakbayan da ken addan dagiti naideportar ditoy pagilyan gapo iti panaglako da ti maipawail nga agas.
