LAOAG CITY – Nakapasa iti 2023 Agriculturist Licensure Examination ti siyam nga iskolar ti gobierno probinsial.
Mainaig iti daytoy, impadanon ni Gob. Matthew Marcos Manotoc ti panangkablaawna kadagiti maseknan.
Gutgutiguten ti gobernador dagitoy a mangusar ti inadalda iti probinsia tapno makatulong dagitoy nga ad-adda pay a mangipadur-as iti benneg ti agrikultura.
Nabigbig dagiti nadakamat nga iskolar ti PGIN a da Miss Remaleen Asuncion a taga Brgy. Caunayan iti siudad ti Batac, Mr. Kestrel Jan Baga a taga Brgy. Tabug iti siudad ti Batac, Mr. Wilmer Basilio a taga Brgy. Capasan iti ili ti Dingras, Miss Aileen Calamasa a taga Brgy, Macayepyep iti ili ti Banna, Miss Mildred Gajes a taga Brgy. Pasil iti ili ti Paoay, Miss Tri-ann Rose Oalog a taga Brgy. Madamba iti ili ti Dingras, Mr. John Mike Planas a taga Brgy. Palongpong iti siudad ti Batac, Miss Lyka Jane Viloria a taga Brgy. Capuriktan iti ili ti Solsona ken ni John Lester Pongtilan a taga Brgy. Baay iti siudad ti Batac.
Kabayatanna, malaksid kadagiti iskolar ti probinsia, impadanon pay ti gobernador ti panangkablaawna ken ni Christian Paul Lazaro manipud ti Mariano Marcos State University College of Agriculture iti panagbalinna a rank 8 iti nadakamat nga eksaminasyon.
